Money Affairs

　
你對金錢嘅態度，差唔多已決定你係邊類人：
　　一、花費者（Spender）　佢地寧可擁有實質嘅嘢，而唔相信較抽象嘅東西，例如銀行存款。佢地享受擁有最新型款嘅玩具，令朋友羡慕，女士由名牌手袋到鑽石珠寶，男士擁有名車名表為榮……。呢類人唔喜歡儲蓄。如果你擁有花費者性格，請每月將收入10％扣起存入銀行，以備不時之需。
　　二、建造者（Builder）　視金錢為工具，為理想而工作，大部分企業家及集團大股東都有呢種性格，但往往低估建立企業所需嘅資金而過分承擔風險，引致事業失敗。如果你擁有此種性格，宜好好控制自己嘅野心，以免過火。
　　三、給予者（Giver）　佢地年輕時往往參加義工，亦係捐款者。佢地只會購買昂貴禮品送畀朋友而自奉甚儉，為他人設想係佢地性格一部分，甚至認為擁有太多金錢係罪過。佢地嘅快樂嚟自令別人快樂，但往往自找麻煩，亦因為太早將金錢用於捐助，自己年紀大時往往生活拮据。如果你擁有咁嘅性格，宜學習「先己及人」，首先搞好自己嘅財政狀況。我老曹父親便擁有咁嘅性格，佢可以同朋友借錢去幫助另外嘅朋友，結果別人唔還錢，搞到自己財政狀況一塌糊塗，母親常罵佢係老好人。「先己及人」係擁有呢類性格者應該考慮，先搞掂自己家庭所需，有餘錢才可幫人。
　　四、節儉者（Saver）　大部分中國人都有此性格，我老曹母親係典型例子。當我老曹月入三百元時，佢仍強制要求每月將三十元儲下來（可能父親嘅給予者性格嚇驚咗佢）；當我老曹收入漸豐，佢仍然好節儉咁生活。佢最大樂趣係眼見銀行存款數字上升。她唔投資亦甚少消費，人生目的似乎為慳錢而活，銀行存款數字上升已可令佢十分高興，永遠省吃儉用。子女成才後，佢又為孫嗰代儲蓄……。如果你係呢類人，我老曹奉勸一句：人生苦短。只要唔係入不敷支，享受一下金錢帶嚟嘅樂趣係冇罪嘅。
　　健全金錢觀應該既係花費者亦係建造者，更加係給予者同節儉者。少壯不努力，老大徒傷悲。年輕時不妨做節儉者，然後學習做建造者（自己唔創業，亦可以投資上市公司股份）；事業有成，財富達到某一個水平便做花費者，享受花錢帶嚟嘅樂趣，再進身為給予者。二十到三十歲應擁有節儉者性格；三十到四十歲宜擁有建造者性格；四十到五十歲應同時擁有花費者性格；五十歲或以上最好有給予者性格。善長人翁必須有一定年紀，唔係話年輕時唔做善事，但基於「先己及人」想法，應先照顧好自己家人，到五十歲或以後自己嘅財力充實咗，再大大筆捐獻唔遲。

(節錄自：曹仁超（投資者日記），信報 2006年2月10日)